नेपाली शेयर न्यूज । नेपाल राष्ट्र बैंकका डेपुटी गभर्नर बम बहादुर मिश्रले बैंक तथा वित्तीय संस्थाका लागि सबैभन्दा सुरक्षित लगानी शेयर बजार नै भएको बताएका छन्। काठमाडौंमा आयोजित कार्यक्रममा बोल्दै उनले बैंकहरूले शेयर बजारमा लगानी गर्न डराउन नहुने बताए ।
मिश्रले शेयर बजारको मूल्य निर्धारण, जोखिम व्यवस्थापन र पारदर्शिताको विषयमा उदाहरणसहित व्याख्या गर्दै बैंकका लागि शेयरमा लगानी व्यावहारिक र सुरक्षित विकल्प बन्न सक्ने बताए।
दैनिक मूल्य सार्वजनिक हुने बजारमा घटबढको आधारमा जोखिम व्यवस्थापन सजिलो हुने उल्लेख गर्दै उनले भने, ‘१८० दिनको एभरेज गणनाका आधारमा मार्जिन कलको प्रक्रिया सहज हुन्छ। घट्यो भने तिर्न आउ, बढ्यो भने लिन आउ भन्ने हुन्छ।’
उनका अनुसार शेयर बजारमा कृत्रिम बुल ट्रेन्डले केही मात्रामा बबल सिर्जना गर्न सक्ने भए पनि यसको निगरानी राष्ट्र बैंककै जिम्मा भएकाले संस्थागत लगानीका लागि विश्वसनीय मानिन्छ । मिश्रले भने, ‘धेरै माथि गयो भने भन्नुपर्ने राष्ट्र बैंक नै हो। त्यसैले डराउनुपर्ने कारण छैन।’
डेपुटी गभर्नर मिश्रले लगानी गर्दा बजारको स्थिरता, दीर्घकालीन दृष्टिकोण र उपयुक्त विकल्पहरूको अध्ययन अनिवार्य रहेको उल्लेख गरे। उनले भने, ‘ट्रम राष्ट्रपति भएपछि अमेरिकामा टेस्लाको सेयर मूल्य तीन महिनापछि मात्रै बढेको थियो। बजारका फन्डामेन्टलहरूलाई हेरेर मात्र लगानी गर्नुपर्छ।’
