नेपाली शेयर न्यूज । नेपाल राष्ट्र बैंकले वित्तीय चेतना अभिवृद्धि गर्न आम नागरिकलाई आम्दानी, खर्च, बजेट, बचत र वित्तीय अनुशासनको पालना गर्न आग्रह गरेको छ। वित्तीय समावेशिता तथा ग्राहक संरक्षण महाशाखाद्वारा जारी सन्देशमा भविष्य सुरक्षित बनाउन नियमित बचत र योजनाबद्ध खर्च आवश्यक रहेको उल्लेख गरिएको छ।
राष्ट्र बैंकका अनुसार आफूले कमाएको रकमको केही हिस्सा आपतकालीन अवस्था, आकस्मिक आवश्यकताका लागि तथा भविष्यका लक्ष्य पूरा गर्न अनिवार्य रूपमा बचत गर्नुपर्छ। यसले अनावश्यक खर्च नियन्त्रण गर्नुका साथै पारिवारिक तनावसमेत कम गर्न सहयोग पुग्ने बताइएको छ।
सन्देशमा आम्दानी र खर्चको स्पष्ट सूची बनाउने, मासिक बजेट तयार गर्ने, अनावश्यक खर्च नगर्ने, नियमित बचत गर्ने र आवश्यक परेमा मात्र ऋण लिने बानी विकास गर्न आग्रह गरिएको छ। लिएको ऋणको सदुपयोग गर्दै समयमै चुक्ता गर्नुपर्नेमा पनि राष्ट्र बैंकले जोड दिएको छ।
नेपाल राष्ट्र बैंकले वित्तीय अनुशासनको पालना गरेर सुरक्षित आर्थिक भविष्य निर्माण गर्न सबैलाई अनुरोध गरेको छ।
